நீங்கள் தேடியது "குற்றால அருவி"

தென்காசி:

தென்மேற்கு பருவ மழையின் போது நெல்லை மாவட்டம் குற்றாலத்தில் ஆண்டுதோறும் ஜூன் மாத தொடக்கத்தில் சீசன் ஆரம்பமாகும். தொடர்ந்து சீசன் ஆகஸ்டு மாதம் இறுதி வரை ரம்மியமாக இருக்கும். சில ஆண்டுகள் செப்டம்பர் மாதம் வரை சீசன் நீடிப்பதுண்டு. இந்த காலங்களில் நாட்டின் பல்வேறு பகுதிகளில் இருந்து குற்றாலம் வரும் சுற்றுலாப் பயணிகள் அருவிகளில் குளித்து சீசனை அனுபவிப்பார்கள்.

இந்த ஆண்டு குற்றால சீசன் கடந்த மே மாதம் இறுதியில் தொடங்கியது. இதனால் சுற்றுலாப் பயணிகள் குற்றாலத்தில் குவிய தொடங்கினர். தொடர்ந்து சீசன் களைகட்டியது. தற்போது வரை அனைத்து அருவிகளிலும் தண்ணீர் தொடர்ந்து விழுந்து கொண்டே இருக்கிறது. அவ்வப்போது மேற்கு தொடர்ச்சி மலைப்பகுதியில் பலத்த மழை பெய்ததால் அருவிகளில் வெள்ளப்பெருக்கு ஏற்பட்டது.

இந்நிலையில் கேரளாவில் பெய்த கனமழையினால் கடந்த ஒரு வாரத்துக்கு மேலாக குற்றாலத்தில் பலத்த மழை பெய்தது. இதனால் குற்றால அருவிகளில் வெள்ளப்பெருக்கு ஏற்பட்டது. குற்றால மெயின் அருவி, ஐந்தருவி, பழைய குற்றாலம், புலியருவி ஆகிய அனைத்து அருவிகளிலும் வெள்ளப்பெருக்கு ஏற்பட்டதால் சுற்றுலா பயணிகள் குளிக்க தடை விதிக்கப்பட்டது. தொடர்ந்து 5 நாட்களாக மழை பெய்து வந்ததால் அருவிகளில் வெள்ளப்பெருக்கு குறையவில்லை. இதனால் சுற்றுலாப் பயணிகள் வருகை குறைந்தது.

இந்நிலையில் நேற்று காலை மலைப்பகுதியில் மழை குறைந்ததையடுத்து குற்றாலம் அருவிகளிலும் வெள்ளம் குறைந்தது. இதனால் அருவிகளில் 5 நாட்களுக்கு பின்னர் சுற்றுலாப் பயணிகள் குளிக்க போலீசார் அனுமதி அளித்தனர். நேற்று விடுமுறை நாளாக இருந்தும் குற்றாலத்துக்கு குறைவான சுற்றுலாப் பயணிகளே வந்திருந்தனர். அவர்கள், மெயின்அருவி, ஐந்தருவி, பழையகுற்றாலம் அருவி, புலியருவி, சிற்றருவியில் ஆனந்தமாக குளித்து மகிழ்ந்தனர். இந்நிலையில் இன்று காலை முதல் குற்றாலத்துக்கு சுற்றுலாப் பயணிகள் அதிகமாக வர தொடங்கினர்.

மெயினருவியில் தாராளமாக விழும் தண்ணீரில் சுற்றுலாப் பயணிகள் குளித்தனர். இதே போல் ஐந்தருவிக்கு செல்லும் சுற்றுலாப் பயணிகள் எண்ணிக்கையும் அதிகரித்தது. ஐந்தருவிக்கு அரசு சிறப்பு பஸ்களும் இயக்கப்பட்டன. சீசன் இன்னும் 2 வாரங்கள் இருக்கும் என்பதால் சீசனை அனுபவிக்க மீண்டும் குற்றாலத்துக்கு சுற்றுலாப் பயணிகள் படையெடுக்க தொடங்கியுள்ளனர். #courtallamfalls

தென்காசி:

குற்றால அருவிகளில் நேற்று முன்தினம் வெள்ளப்பெருக்கு ஏற்பட்டது. இதைத்தொடர்ந்து மெயினருவி, ஐந்தருவி, பழையகுற்றாலம் அருவிகளில் குளிக்க தடை விதிக்கப்பட்டது.

இந்த நிலையில் மேற்குத்தொடர்ச்சி மலைப்பகுதியில் நேற்று முன்தினம் இரவு முழுவதும் மழை பெய்து கொண்டே இருந்தது. இதனால் அனைத்து அருவிகளிலும் வெள்ளப்பெருக்கு அதிகரித்தது. மெயினருவியில் ஆர்ச்சை தாண்டி அதன் முன்புறம் உள்ள பாலம் வரை தண்ணீர் ஆர்ப்பரித்து கொட்டியது.

ஐந்தருவியிலும் அதிகமான வெள்ளப்பெருக்கு ஏற்பட்டது. இதேபோல் பழைய குற்றாலம் அருவி, புலியருவி ஆகியவற்றிலும் தண்ணீர் கொட்டியது. இதனால் மெயினருவி, ஐந்தருவி, பழைய குற்றாலம் அருவிகளில் சுற்றுலாப்பயணிகள் குளிக்க நேற்று 2-வது நாளாக தடை நீடித்தது.

புலியருவியில் வெள்ளப்பெருக்கு அதிகமாக இருந்ததால் அங்கும் நேற்று குளிக்க தடை விதிக்கப்பட்டது. சிற்றருவியில் மட்டும் சுற்றுலாப்பயணிகள் குளிக்க அனுமதிக்கப்பட்டனர். நேற்று விடுமுறை நாள் என்பதால் சுற்றுலாப்பயணிகள் கூட்டம் அதிகமாக இருந்தது. அவர்கள் குளிக்க தடை விதிக்கப்பட்டதால் ஏமாற்றத்துடன் திரும்பி சென்றனர்.

நேற்று மாலை பலத்த மழையுடன் சூறாவளி காற்று வீசியது. இதையடுத்து குற்றாலம்-தென்காசி சாலையில் பெண்கள் கல்லூரி அருகில் பழமையான மருதமரம் ஒன்று வேரோடு சாய்ந்தது. இதனால் சுமார் 2 மணி நேரம் போக்குவரத்து பாதிக்கப்பட்டது. உடனடியாக தீயணைப்பு படை வீரர்கள் வந்து மரத்தை அகற்றும் பணியில் ஈடுபட்டனர். பின்னர் போலீசார் வந்து போக்குவரத்தை சீரமைத்தனர்.

இந்நிலையில் மேற்குத் தொடர்ச்சி மலையில் பெய்து வரும் கனமழையால் இன்றும் அருவிகளில் வெள்ளப்பெருக்கு அதிகரித்துள்ளது. மெயினருவி, ஐந்தருவி, பழையகுற்றாலம் உள்ளிட்ட அனைத்து அருவிகளிலும் தண்ணீர்பெருக்கு ஏற்பட்டுள்ளது.

இதையடுத்து இன்று 3-வது நாளாக சுற்றுலாப்பயணிகள் குளிக்க தடை விதிக்கப்பட்டது. இன்று தென்காசி, குற்றாலம் பகுதியில் சற்று மழை குறைந்துள்ளது.

இதேபோல் மணிமுத்தாறு அருவியில் தண்ணீர் 3-வது நாளாக ஆக்ரோ‌ஷமாக கொட்டுகிறது. இதையடுத்து 3-வது நாளாக இன்று மணிமுத்தாறு அருவியிலும் குளிக்க தடை விதிக்கப்பட்டது.  #CoutrallamFalls

தென்காசி:

மேற்கு தொடர்ச்சி மலைப்பகுதிகளில் தொடர்ந்து மழை பெய்து வருவதால் குற்றாலத்தில் சீசன் களை கட்டியுள்ளது. குற்றாலம் அருவிப் பகுதிகளில் தொடர்ந்து சாரல் பெய்தவண்ணம் இருந்துவந்தது.

அவ்வப்போது மழை பெய்துவருவதால் குளுகுளு காலநிலை நிலவுகிறது. அவ்வப்போது சூரியனின் வெளிச்சம் தலைகாட்டியபோதிலும் மலைப்பகுதிகளில் சாரல் வெளுத்து கட்டுவதால் அருவிகளுக்கு வரும் தண்ணீர் வரத்து அதிகரித்து வருகிறது.

குற்றாலத்தில் நேற்று வானம் மேகமூட்டத்துடனும், சில்லென்ற தென்றல் காற்றும் வீசியவண்ணம் உள்ள‌து. இதனால் மெயினருவி, ஐந்தருவி, பழைய குற்றாலம் உள்ளிட்ட அருவிகள் அனைத்திலும் சுற்றுலா பயணிகள் கூட்டம் அலைமோதுகிற‌து. சீசன் அருமையாக உள்ளதால் சுற்றுலா பயணிகள் மட்டுமின்றி தென்காசி மற்றும் சுற்றுவட்டாரங்களில் உள்ள விவசாயிகளும் மகிழ்ச்சி அடைந்துள்ளனர். குற்றாலம் பஜார்களில் விற்பனையும் ஜோராக நடைபெற்று வருகிறது.

இதனால் வியாபாரிகளும் மகிழ்ச்சி அடைந்துள்ளார்கள். குற்றாலத்தில் உள்ள பேரூராட்சி விடுதிகள் உள்பட அனைத்து விடுதிகளும் நிரம்பி வழிகின்றன. குற்றாலம் ஐந்தருவி சாலையில் உள்ள படகுகுழாமிலும் சுற்றுலா பயணிகளின் கூட்டம் அலைமோதியது.

குற்றாலத்தில் உள்ள அனைத்து அருவிகளிலும் சுற்றுலா பயணிகள் இரவும் பகலும் ஆனந்தமாய் குளித்து மகிழ்கின்றனர். இதனிடையே குற்றாலம் மெயினருவியில் கூட்ட நெரிசலை தவிர்க்கவும், அனைவரும் குளித்து மகிழவும் போலீசார் நடவடிக்கை மேற்கொண்டனர்.

அதன்படி ஒரே நேரத்தில் 50 சுற்றுலா பயணிகள் மட்டும் குளிக்கவும், அவர்கள் குளித்த பின்னர் அடுத்து 50 பேரை அனுமதிக்கவும் போலீசார் திட்டமிட்டனர். பெண்கள் நீண்ட வரிசையில் நின்று குளிக்க அனுமதிக்கப்ப‌ட்டார்கள். இதற்காக அருவிக்கரையில் கூடுதல் போலீசார் நிறுத்தப்பட்டு இந்த பணிகளில் ஈடுப‌ட்டார்கள். இதனால் சுற்றுலா பயணிகள் அனவருமே ஆனந்தமாக குளித்து மகிழ்ந்தனர். #CourtallamFalls

தென்காசி:

கேரள மாநிலத்தில் தென்மேற்கு பருவமழை பெய்யத்தொடங்கும் போது நெல்லை மாவட்டம் குற்றாலத்தில் சீசன் தொடங்கும். ஒவ்வொரு ஆண்டும் ஜூன், ஜூலை, ஆகஸ்டு ஆகிய 3 மாதங்கள் குற்றாலத்தில் சீசன் நிலவும். இந்த ஆண்டு மே மாத இறுதியிலேயே சீசன் தொடங்கியது.

இதையடுத்து அனைத்து அருவிகளிலும் தண்ணீர் விழத்தொடங்கியது. ஜூன் மாதம் முழுவதும் அனைத்து அருவிகளிலும் தண்ணீர் ஆர்ப்பரித்து கொட்டி வந்த நிலையில், இந்த மாத தொடக்கத்தில் திடீரென குறைந்தது. ஒருவாரத்திற்கு பின் அருவிகளில் மீண்டும் தண்ணீர் கொட்டத்தொடங்கியது.

சாரல் மழை, குளுகுளு காற்றுடன் குற்றாலத்தில் சீசன் களை கட்டியதால் சுற்றுலா பயணிகள் வருகை அதிகரித்தது. இந்நிலையில் மேற்குதொடர்ச்சி மலைப்பகுதியில் கடந்த ஒரு வாரத்திற்கு மேலாக பலத்த மழை பெய்து வருகிறது. குற்றாலம் மலைப்பகுதியில் கனமழை பெய்ததால் மெயினருவி, ஐந்தருவி, பழையகுற்றாலம் ஆகிய அருவிகளில் வெள்ளப்பெருக்கு ஏற்பட்டது. இதனால் அந்த அருவிகளில் குளிக்க தடை விதிக்கப்பட்டது.

நேற்று 3-வது நாளாக அந்த அருவிகளில் குளிக்க தடை நீடித்ததால் குற்றாலத்திற்கு வந்த சுற்றுலா பயணிகள் ஏமாற்றத்துடன் திரும்பி சென்றனர். நேற்று இரவு ஐந்தருவி மற்றும் பழையகுற்றால அருவியில் வெள்ளப்பெருக்கு குறைந்ததால் அந்த இரு அருவிகளிலும் குளிக்க சுற்றுலா பயணிகள் அனுமதிக்கப்பட்டனர்.

மெயினருவி தொடர்ந்து தண்ணீர் அதிகளவில் கொட்டியதால் அங்கு குளிக்க அனுமதிக்கப்படவில்லை. இந்நிலையில் இன்று காலை மெயினருவியில் வெள்ளப்பெருக்கு ஓரளவு குறைந்தது. இதனால் அந்த அருவியில் 3 நாட்களுக்கு பிறகு இன்று சுற்றுலா பயணிகள் குளிக்க அனுமதிக்கப்பட்டனர்.

மெயினருவியில் ஆர்ச்சை தொட்டபடி தண்ணீர் ஆர்ப்பரித்து கொட்டுவதால் அருவியின் நடுப்பகுதிக்கு சென்று குளிக்க சுற்றுலா பயணிகளை போலீசார் அனுமதிக்கவில்லை. குற்றாலம் மலைப்பகுதி மட்டுமின்றி, சுற்றுவட்டாரப் பகுதிகளில் தொடர்ந்து மலைப்பெய்து வருகிறது.

மேலும் காற்றும் வேகமாக வீசி வருகிறது. மழை தொடர்ந்து பெய்வதால் அருவிகளில் மீண்டும் வெள்ளப்பெருக்கு ஏற்படலாம் என்பதால் தண்ணீர் வரத்தை போலீசார் தொடர்ந்து கண்காணித்தபடி உள்ளனர்.

தென்காசி:

கேரள மாநிலத்தில் தென்மேற்கு பருவமழை பெய்யும் போது நெல்லை மாவட்டம் குற்றாலத்தில் சீசன் தொடங்கும். கேரளாவில் கடந்த மாத இறுதியிலேயே தென்மேற்கு பருவமழை பெய்ய தொடங்கியதால் குற்றால சீசனும் அப்போதே தொடங்கி விட்டது.

சீசன் தொடங்கிய சில நாட்களில் மெயினருவி, ஐந்தருவி உள்ளிட்ட அனைத்து அருவிகளிலும் தண்ணீர் ஆர்ப்பரித்து கொட்டியது. பின்பு சில நாட்கள் தண்ணீர் வரத்து குறைந்தது.

இதையடுத்து மேற்கு தொடர்ச்சி மலைப்பகுதியில் தொடர்ந்து மழை பெய்து வருகிறது. குற்றாலம் மலைப் பகுதியிலும் தொடர்ந்து மழை பெய்வதால் அருவிகளில் மீண்டும் தண்ணீர் வரத்து அதிகரித்தது. கடந்த சில நாட்களுக்கு முன்பு மெயினருவி மற்றும் ஐந்தருவியில் கடும் வெள்ளப்பெருக்கு ஏற்பட்டதால் அந்த அருவிகளில் குளிக்க தொடர்ச்சியாக 3 நாட்கள் தடை விதிக்கப்பட்டது. பின்பு வெள்ளப்பெருக்கு குறைந்ததால் தடை நீக்கப்பட்டது.

தற்போது குற்றாலம் மலைப்பகுதி மற்றும் சுற்று வட்டார பகுதிகளில் தொடர்ந்து சாரல் மழை பெய்வதால் மெயினருவி, ஐந்தருவி, பழைய குற்றால அருவி, புலியருவி என அனைத்து அருவிகளிலும் தண்ணீர் ஆர்ப்பரித்து கொட்டி வருகிறது.

மெயினருவி, ஐந்தருவிகளில் நேற்று மாலை வெள்ளப்பெருக்கு ஏற்பட்ட நிலையில் இன்று வெள்ளம் குறைந்தது. மெயினருவியில் ஆர்ச்சை தொட்டப்படியும், ஐந்தருவியில் ஐந்து கிளைகளிலும் தண்ணீர் விழுகிறது. அருவிகளில் தண்ணீர் ஆர்ப்பரித்து கொட்டுவதால் குற்றாலத்திற்கு வரும் சுற்றுலா பயணிகள் எண்ணிக்கை அதிகரித்துள்ளது. அவர்கள் சாரல் மழையில் நனைந்தபடி அருவிகளில் ஆனந்தமாக குளித்து மகிழ்ந்தனர். குற்றாலத்தில் தொடர்ந்து சாரல் மழை பெய்து வருவதால் அருவிகளில் வரும் தண்ணீர் வரத்தை போலீசார் கண்காணித்து வருகின்றனர்.

ஐந்தருவியில் கடந்த சில நாட்களாக தண்ணீர் அதிகளவில் கொட்டி வருவதால், படகு சவாரி நடக்கும் வெண்ணமடை குளத்திற்கு தண்ணீர் வரத்தொடங்கியது. அந்த குளம் தற்போது முழுவதுமாக தண்ணீர் நிரம்பி காணப்படுகிறது. இதனால் அங்கு படகு சவாரி விரைவில் தொடங்கப்படலாம் என எதிர்பார்க்கப்படுகிறது.

படகு சவாரிக்காக பழைய படகுகள் அனைத்தும் பராமரிக்கப்பட்டு தயார் நிலையில் உள்ளன. அதே போல் புதிதாக 20 படகுகளும் வந்துள்ளன. ஐந்தருவிக்கு வரும் சுற்றுலா பயணிகள் படகு சவாரி நடக்கும் என நினைத்து படகு குழாமுக்கு வந்து செல்கிறார்கள். ஆனால் படகு சவாரி தொடங்கப்படாததை பார்த்து ஏமாற்றத்துடன் திரும்பி செல்கிறார்கள். ஆகவே அங்கு விரைவில் படகு சவாரி தொடங்கப்பட வேண்டும் என சுற்றுலா பயணிகள் வலியுறுத்தியுள்ளனர்.

தென்காசி:

கேரளாவில் தென்மேற்கு பருவமழை தொடங்கும் போது குற்றாலத்தில் சீசன் தொடங்கும். இதை தொடர்ந்த ஆண்டுதோறும் ஜூன், ஜூலை, ஆகஸ்ட்டு மாதங்களில் குற்றால அருவிகளில் தண்ணீர் நன்றாக விழும்.

குற்றால சீசனையொட்டி இந்தியாவின் பல்வேறு பகுதிகளில் இருந்தும் சுற்றுலா பயணிகள் ஏராளமானவர்கள் வருவார்கள். நெல்லை மாவட்டம் குற்றாலத்தில் இந்த ஆண்டு ஜூன் மாதம் தொடங்குவதற்கு முன்பாகவே சீசனுக்கான அறிகுறி காணப்பட்டது. கடந்த வாரம் சாரல் மழை விட்டு, விட்டு பெய்தது. இதனால் மெயின் அருவி, ஐந்தருவியில் தண்ணீர் மிதமாக விழுந்தது.

மேலும் கேரளாவில் தென்மேற்கு பருவ மழை பெய்ததால் குற்றாலம் மெயின் அருவி, ஐந்தருவியில் தண்ணீர் வரத்து அதிகரித்தது.

குற்றாலத்தில் சீசன் களை கட்ட தொடங்கி பிரதான அருவிகளான மெயின் அருவி, ஐந்தருவியில் தண்ணீர் விழ தொடங்கியதை அறிந்த சுற்றுலா பயணிகள் குற்றாலத்திற்கு படையெடுத்து வந்தனர். அருவிகளில் தண்ணீர் விழத்தொடங்கியதால் சீசன் தொடங்கி விட்டதாக சுற்றுலா பயணிகள் மிகுந்த மகிழ்ச்சி அடைந்தனர்.

இந்நிலையில் கடந்த 2 நாட்களாக மேற்கு தொடர்ச்சி மலைப்பகுதிகளில் மழை பெய்யவில்லை. இதனால் மெயின் அருவி, ஐந்தருவி, பழைய குற்றாலம் அருவிகளில் தண்ணீர்வரத்து குறைந்து காணப்படுகிறது. இன்று காலை குற்றாலத்தில் குறைவாக தண்ணீர் விழுந்தாலும் இதமான தட்பவெப்பநிலை காணப்படுகிறது. இதையடுத்து சுற்றுலாப்பயணிகளின் கூட்டமும் அதிகமாகவே காணப்படுகிறது.